قصيدة تعج بالمفردات والقيم الاصلية التي قلما تجدها في هذا الزمان 
قصيدة معبرة بكل ما تنعي هذه الكلمة من معنى 
فصح لسان شاعرها
الشاعر سعد بن مناحي القحطاني

الطيب فرصه والجمايـل توافيـق
ومن لاتوفق ماكتـب لـه جمالـه

ومن لارقى للطيب روس الشواهيق
مازان لـه وقتـه علـى مابدالـه

وما دام لفعول الجمايل عشاشيـق
كسب الجمايل مايجـي بالسهالـه

ولو انها تشرب مع فكّـة الريـق
كل خذاله كـل مـا أصبـح بيالـه

والطيب منوه للقلـوب المشافيـق
كـل يتـوق ومنوتـه راس مالـه

والمدح مايزهى على الرجل ويليق
الا لاصـارت وافيـات خصـالـه

يستاهلـه رجـل يفـك المزانيـق
اللـي يقـال ونعـم لاجـا مجالـه

ومن ساقته نفسه وهو مابعد سيق
لأجـل الجميـل يزيّـن الله فالـه

والمرجله ماهي بتحتـاج تنسيـق
من بين قلب اللي عشقهـا وبالـه

ومن عادة الدنيا تخون المواثيـق
تفتـرّ مكرتهـا سـواة المحالـه

ولولا اللوازم ماعرفنـا المخاليـق
مانعـرف الرجّـال ليـن انعنالـه

والكفؤ تظهر فزعته حزة الضيـق
وينشاف في الشده بعيـن العدالـه

نسل الرجـال متّعبيـن الملاحيـق
متوسط مـن بيـن عمـه وخالـه

واللي يطيق ولا بغى قال ما أطيـق
تحرم عليـه المرجلـه والشكالـه

والهيّنه تكبر على اللاش والهيـق
له في الرخاء قاله وفي الضيق قاله

والطيب شاره والضماير صناديـق
والـلاش طيبـه ماتعـدّى ظلالـه

وأنا أسبر قلوب الرجال المغاليـق
والصامت أقطع غايته مـن مقالـه

ومادام في الدنيا رجـال ومطاليـق
نصيتهـم والـلاش مالـي ومالـه

سعد بن مناحي القحطاني